నేవీలో 1159 ట్రేడ్స్‌మెన్‌ పోస్టులు

కెరీర్‌ గైడెన్స్‌

నేవీలో 1159 ట్రేడ్స్‌మెన్‌ పోస్టులు

భారత నౌకాదళం 1159 ట్రేడ్స్‌మెన్‌ మేట్‌ పోస్టుల భర్తీకి ప్రకటన విడుదలచేసింది. పదోతరగతి అనంతరం ఐటీఐ కోర్సులు పూర్తిచేసినవారు వీటికి పోటీ పడవచ్చు. పరీక్షలో చూపిన ప్రతిభ ద్వారా నియామకాలు చేపడతారు. ఎంపికైతే నౌకాదళ కార్యాలయాల్లో విధులు నిర్వర్తించాల్సి ఉంటుంది.
ఈ నియామకాల కోసం ఆన్‌లైన్‌ పరీక్షను వంద మార్కులకు నిర్వహిస్తారు. ప్రతి ప్రశ్నకు ఒక మార్కు. ఇందులో జనరల్‌ ఇంటలిజెన్స్‌ అండ్‌ రీజనింగ్‌ 25, న్యూమరికల్‌ ఆప్టిట్యూడ్‌/ క్వాంటిటేటివ్‌ ఎబిలిటీ 25, జనరల్‌ ఇంగ్లిష్‌ అండ్‌ కాంప్రహెన్షన్‌ 25, జనరల్‌ అవేర్‌నెస్‌ 25 ఆబ్జెక్టివ్‌ ప్రశ్నలు వస్తాయి. ప్రశ్నపత్రం ఇంగ్లిష్, హిందీ మాధ్యమాల్లో ఉంటుంది.

ఈ అంశాల్లో ప్రశ్నలు..
> జనరల్‌ ఇంటలిజెన్స్‌ అండ్‌ రీజనింగ్‌లో.. మ్యాథ్స్‌ ఆపరేషన్స్, సిరీస్, ఆడ్‌మెన్‌ అవుట్, లాజికల్‌ వెన్‌ డయాగ్రమ్‌లు, ఎనాలజీ, వర్డ్‌ బేస్డ్‌ ప్రాబ్లమ్స్, ప్రాబ్లమ్‌ సాల్వింగ్, డ్రాయింగ్‌ ఇన్ఫరెన్స్, కోడింగ్‌ డీకోడింగ్, నాన్‌ వెర్బల్‌ రీజనింగ్‌ నుంచి ప్రశ్నలు వస్తాయి.
> క్వాంటిటేటివ్‌ ఎబిలిటీలో... నంబర్‌ సిస్టమ్స్, టైమ్‌ అండ్‌ వర్క్, రేషియో అండ్‌ ప్రపోర్షన్, సరాసరి, లాభనష్టాలు, రాయితీ, శాతాలు, కాలం-దూరం, వడ్డీలు, గణాంక చార్టులు, చలన జ్యామితి, త్రికోణమితిల్లో ప్రశ్నలు ఉంటాయి.
> ఇంగ్లిష్‌ విభాగంలో... పదసంపద, వ్యాకరణం, వాక్య నిర్మాణం, సమానార్థాలు, వ్యతిరేక అర్థాలు, కాంప్రహెన్షన్, వాడుక...తదితర అంశాల నుంచి అడుగుతారు.
> జనరల్‌ అవేర్‌నెస్‌ విభాగంలో... పొరుగు దేశాలతో భారత్‌ సంబంధాలు, క్రీడలు, చరిత్ర, సంస్కృతి, భౌగోళికాంశాలు, భౌతిక రసాయశాస్త్రాలు, పర్యావరణం, ఆర్థిక, వర్తమాన అంశాలు, విధివిధానాలు, భారత రాజ్యాంగం, సైన్స్‌ పరిశోధనల నుంచి ప్రశ్నలు వస్తాయి.
ఈ ప్రశ్నలన్నీ సాధారణ స్థాయిలోనే ఉంటాయి. వీటికి జవాబులు గుర్తించడానికి ప్రత్యేక ప్రావీణ్యం అవసరం లేదు. 8, 9, 10 తరగతుల మ్యాథ్స్, సైన్స్, సోషల్, ఇంగ్లిష్‌ పుస్తకాలు బాగా చదువుకుంటే అధిక మార్కులు సాధించవచ్చు. ఇప్పటికే బ్యాంకు, ఆర్‌ఆర్‌బీ పరీక్షలకు సన్నద్ధమవుతున్నవారు వీటికోసం ప్రయత్నించవచ్చు.

విధుల్లో ఇలా...
ఉద్యోగంలో చేరినవారికి రూ.18,000 మూలవేతనం లభిస్తుంది. డీఏ, హెచ్‌ఆర్‌ఏ..తదితరాలతో కలుపుకుని రూ.27 వేల వరకు ప్రారంభ వేతనం పొందవచ్చు. వీరు ప్రధానంగా సబ్‌మెరైన్లు, నౌకల తయారీ/నిర్వహణ విధుల్లో పాల్గొంటారు. వీటికి సంబంధించిన వివరాలు నమోదు...తదితరాలు వీరి బాధ్యతల్లో భాగం. అలాగే కార్యాలయాల్లో చేయాల్సిన సహాయక కార్యక్రమాల్లో వీరు భాగమవుతారు.
ఖాళీలు కమాండ్ల వారీగా: తూర్పు నౌకాదళం, విశాఖపట్నం- 710, పశ్చిమ నౌకాదళం, ముంబయి- 324, సదరన్‌ కమాండ్, కోచి- 125 ఉన్నాయి.
అర్హత: పదోతరగతి ఉత్తీర్ణతతోపాటు ఐటీఐ సర్టిఫికెట్‌ అవసరం
వయసు: 18-25 ఏళ్లలోపు ఉండాలి. ఎస్సీ, ఎస్టీలకు అయిదేళ్లు; ఓబీసీలకు మూడేళ్లు, దివ్యాంగులకు పదేళ్లు గరిష్ఠ వయసులో సడలింపులు వర్తిస్తాయి.

ఆన్‌లైన్‌ దరఖాస్తులు: మార్చి 7 సాయంత్రం 5 వరకు స్వీకరిస్తారు.
దరఖాస్తు ఫీజు: రూ.205. మహిళలు, దివ్యాంగులు, ఎస్సీ, ఎస్టీలు చెల్లించనవసరం లేదు.

పరీక్ష తేదీ: తర్వాత ప్రకటిస్తారు. వెబ్‌సైట్‌: www.joinindiannavy.gov.in/