అన్నీ నేర్చుకో.. ఆన్‌లైన్‌లో!

రిజిస్ట్రేషన్లకు ఎన్‌పీటీఈఎల్‌ ఆహ్వానం

ఆసక్తి ఉంటే చాలు.. విద్యార్హతలతో సంబంధం లేకుండా ఆన్‌లైన్‌లో ఉచితంగా వీడియో పాఠాలు వింటూ నేర్చుకోవచ్చు. వివిధ సబ్జెక్టుల్లో పట్టు సాధించడానికి 500కు పైగా నాణ్యమైన కోర్సులు ఇప్పుడు అందుబాటులో ఉన్నాయి. వీటిలో ప్రవేశానికి నేషనల్‌ ప్రోగ్రాం ఆన్‌ టెక్నాలజీ ఎన్‌హ్యాన్స్‌డ్‌ లర్నింగ్‌ (ఎన్‌పీటీఈఎల్‌) రిజిస్ట్రేషన్లను ఆహ్వానిస్తోంది. చదువుతోన్న కోర్సుల్లో మరింత పరిజ్ఞానానికీ, కొత్త సబ్జెక్టుల్లో ప్రావీణ్యానికీ ఈ వీడియో పాఠాలు ఉపయోగపడతాయి.    పోటీ పరీక్షలకు సన్నద్ధమవుతున్నవారూ, నైపుణ్యాలను మెరుగుపరచుకోవాలని ఆశించేవారూ వీటిలో చేరి తమ పరిధి విస్తరించుకోవచ్చు.  కోర్సు చివరిలో పరీక్ష రాసి సర్టిఫికెట్‌ అందుకునే అవకాశమూ ఉంది!
నేర్చుకోవాలనే జిజ్ఞాస ఉన్నప్పటికీ చెప్పేవారు లేకపోవచ్చు. వినడానికి ఆసక్తి ఉన్నప్పటికీ ఫీజు చెల్లించడానికి స్థోమత సరిపోక పోవచ్చు. కాలేజీకి వెళ్లే అవకాశం ఉండకపోవచ్చు. ఒకవేళ వెళ్లినప్పటికీ సరిగా చెప్పేవారు లేకపోవచ్చు. సమస్య ఏమైనప్పటికీ అందరికీ పనికొచ్చే పరిష్కారం ఒకటి ఉంది. అదే ఎన్‌పీటీఈఎల్‌. విద్యా నేపథ్యం ఏదైనప్పటికీ ప్రతి ఒక్కరికీ ఉపయోగపడే కోర్సులను ఈ వేదిక అందిస్తోంది.
ఇంజినీరింగ్‌, ఇంగ్లిష్‌, మ్యాథ్స్‌, మేనేజ్‌మెంట్‌, ఫిజిక్స్‌, పర్సనాలిటీ డెవలప్‌మెంట్‌, హ్యుమానిటీస్‌, సోషల్‌ సైన్సెస్‌... ఇలా ఎన్నో విభాగాలూ, సబ్జెక్టుల్లో వీడియో పాఠాలను రూపొందించారు. ఇంజినీరింగ్‌లో కంప్యూటర్‌ సైన్స్‌, మెకానికల్‌, సివిల్‌, ఎల‌్రక్టికల్‌ అండ్‌ ఎల‌్రక్టానిక్స్‌, మెటలర్జీ, ఏరోస్పేస్‌, ఆర్కిటెక్చర్‌ తదితర బ్రాంచీలవారీగా కోర్సులు లభిస్తున్నాయి. ఇవన్నీ బీటెక్‌, ఎంటెక్‌ చదువుతున్నవారితోపాటు గేట్‌, ఐఈఎస్‌ లాంటి పోటీ పరీక్షార్థులకూ ఉపయోగం.
ఆసక్తి ఉన్నవారు https://nptel.ac.in/ వెబ్‌సైట్‌లో వివరాలు నమోదు చేసుకోవచ్చు. విద్యా నేపథ్యం, అవసరాన్ని బట్టి నచ్చిన కోర్సు ఎంచుకోవచ్చు. అర్హతలు, వయసు నిబంధనలు ఏమీ లేవు. ఈ వీడియో పాఠాలను ఐఐటీలు, ఐఐఎస్‌సీ, ఐఐఎస్‌ఈఆర్‌లు, ఇతర పేరున్న సంస్థల్లోని ప్రొఫెసర్లు అందిస్తున్నారు. గతంలో రూపొందించినవాటితోపాటు కొత్త కోర్సులూ చేర్చారు.
ఇదీ షెడ్యూల్‌...
ఆన్‌లైన్‌ పాఠాలు వచ్చే జనవరిలో మొదలై ఏప్రిల్‌ వరకు కొనసాగుతాయి. జనవరి - ఏప్రిల్‌ సెషన్‌లో అన్ని విభాగాల్లోనూ కలుపుకుని 500కు పైగా కోర్సులను అందుబాటులో ఉంచారు. కోర్సు నేపథ్యం, పరిధి బట్టి వీటిని 4, 8, 12 వారాల వ్యవధితో నిర్వహిస్తారు. కోర్సును బట్టి ప్రతివారం దాదాపు 4 గంటలు వీడియో పాఠాలు అందిస్తారు. సందేహాలను నివృత్తి చేసుకునే సౌకర్యమూ కల్పించారు. వారంవారం అసైన్‌మెంట్లు ఉంటాయి. కోర్సు పూర్తయిన తర్వాత పరీక్షలూ రాసుకోవచ్చు. ఇందులో అర్హత సాధించినవారికి ఎల‌్రక్టానిక్‌ సర్టిఫికెట్‌ ప్రదానం చేస్తారు. పరీక్ష రాయాలనుకున్నవారు అసైన్‌మెంట్లను పూర్తిచేయడం తప్పనిసరి. ఒక అభ్యర్థి ఎన్ని కోర్సుల్లోనైనా చేరవచ్చు గరిష్ఠంగా 6 పరీక్షలు రాసుకోవచ్చు.
* 4, 8 వారాల వ్యవధి ఉండే కోర్సులు రెండు విడతల్లో మొదలవుతాయి. నచ్చిన విడతను ఎంచుకోవచ్చు. 4 వారాల కోర్సుల మొదటి సెషన్‌ జనవరి 18న మొదలై ఫిబ్రవరి 21తో ముగుస్తుంది. రెండో విడత ఫిబ్రవరి 15తో మొదలై మార్చి 12తో పూర్తవుతుంది.
* 8 వారాల కోర్సులు తొలి విడత జనవరి 18న మొదలై మార్చి 12 వరకు కొనసాగుతాయి. రెండో విడతలో ఫిబ్రవరి 15 నుంచి ఏప్రిల్‌ 9 వరకు ఉంటాయి.
* 12 వారాల కోర్సులు మాత్రం జనవరి 18 నుంచి ఏప్రిల్‌ 9 వరకు ఒకే విడతలో ఉంటాయి.
మొదటి సెషన్‌లో చేరడానికి, 12 వారాల కోర్సులకు జనవరి 25లోగా వివరాలు నమోదు చేసుకోవాలి. రెండో సెషన్‌కు గడువు ఫిబ్రవరి 15 వరకు ఉంది.సెషన్‌ 1లో 4, 8 వారాల కోర్సుల్లో చేరినవారికి మార్చి 21న పరీక్షలు నిర్వహిస్తారు. సెషన్‌ 2లో 4, 8 వారాల కోర్సులతోపాటు 12 వారాల కోర్సుల వారికి ఏప్రిల్‌ 24, 25 తేదీల్లో పరీక్షలు ఉంటాయి.
ఏం నేర్పుతారు?
ఇంగ్లిష్‌ లాంగ్వేజ్‌ ఫర్‌ కాంపిటీటివ్‌ ఎగ్జామినేషన్స్‌ కోర్సు ఉదాహరణగా తీసుకుంటే..దీన్ని 12 వారాల వ్యవధితో నిర్వహిస్తున్నారు. ఐఐటీ మద్రాస్‌ ఆధ్వర్యంలో ఈ కోర్సు నడుపుతున్నారు. ఈ తరగతుల్లో భాగంగా పోటీ పరీక్షలకు అవసరమైన అడ్వాన్స్‌డ్‌- గ్రామర్‌, ఒకాబ్యులరీ, రీడింగ్‌, రైటింగ్‌ అంశాలను బోధిస్తారు. ప్రాక్టీస్‌ టెస్టులు ఉంటాయి. ఎఫెక్టివ్‌ రైటింగ్‌ కోర్సును 4 వారాల వ్యవధితో అందిస్తున్నారు. ఇందులో ప్రభావంతంగా రాయడానికి అవసరమైన మెలకువలు, వ్యాసరచన, బిజినెస్‌ లెటర్‌ రాసే విధానం, రిపోర్ట్‌ రైటింగ్‌, క్రియేటివ్‌ రైటింగ్‌..మొదలైనవి ఆకర్షణీయంగా రాయడమెలాగో నేర్పుతారు. విద్యార్థులు, ఉద్యోగులు అందరికీ ఈ కోర్సు
ఉపయోగకరం.

* ఎమోషనల్‌ ఇంటలిజెన్స్‌, సీ, జర్మన్‌, జావా, క్లౌడ్‌ కంప్యూటింగ్‌, ఇంటర్నెట్‌ ఆఫ్‌ థింగ్స్‌, టెస్టింగ్‌, డేటా సైన్స్‌, డేటా ఎనలిటిక్స్‌, మెషిన్‌ లర్నింగ్‌, పైథాన్‌.. కోర్సులెన్నో ఉన్నాయి.
* బ్యాంక్‌, ఎస్‌ఎస్‌సీ, రైల్వే... తదితర పోటీ పరీక్షల అభ్యర్థులను దృష్టిలో ఉంచుకుని ఇంగ్లిష్‌ లాంగ్వేజ్‌ ఫర్‌ కాంపిటీటివ్‌ ఎగ్జామ్స్‌ కోర్సు అందిస్తున్నారు.
* ప్రభావవంతంగా మాట్లాడడం ఎలాగో ఆచరణాత్మకంగా తెలుసుకోవడానికి ‘స్పీకింగ్‌ ఎఫెక్టివ్‌లీ’ కోర్సు ఎంచుకుంటే చాలు.
* ఐఐటీ ప్రవేశాలకోసం జేఈఈకి సిద్ధమవుతున్నవారి కోసం, బీఎస్సీ, ఎమ్మెస్సీ, ఇంజినీరింగ్‌ ప్రథమ సంవత్సరం విద్యార్థులకోసం.. మ్యాథ్స్‌, ఫిజిక్స్‌, కెమిస్ట్రీ సబ్జెక్టుల్లో క్లిష్టమైన అంశాలను తేలికగా అర్థం చేసుకునేలా బోధించడానికి ప్రొఫెసర్లు అందుబాటులో ఉన్నారు.
* ఆసక్తిగా, అందరినీ ఆకట్టుకునేలా రాయాలని ఆశించేవారికోసం ఎఫెక్టివ్‌ రైటింగ్‌ కోర్సును అభ్యసించవచ్చు.
* కంప్యూటర్‌ సైన్స్‌ విభాగంలో సాధారణ గ్రాడ్యుయేట్లకు, ఆసక్తి ఉన్నవారికోసం బేసిక్‌ కోర్సులతో పాటు అడ్వాన్స్‌డ్‌ కోర్సులూ లభిస్తున్నాయి.
* ఉద్యోగ ప్రయత్నాల్లో ఉన్నవారు, వ్యవహార నైపుణ్యాలు పెంపొందించుకోవాలని ఆశించేవారు సాఫ్ట్‌స్కిల్‌ డెవలప్‌మెంట్‌ కోర్సులో చేరిపోవచ్చు.

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు

మరిన్ని

రుచులు

App