పిలుస్తోంది ప్రేమ్‌జీ వర్సిటీ

కెరీర్‌ గైడెన్స్‌

పిలుస్తోంది ప్రేమ్‌జీ వర్సిటీ

మేటి సంస్థల్లో యూజీ, పీజీ కోర్సుల్లో ప్రామాణిక విద్యను అభ్యసించాలనుకునేవారికి అజీం ప్రేమ్‌జీ విశ్వవిద్యాలయం వేదికగా నిలుస్తోంది. తక్కువ ఆదాయం ఉన్నవారు బోధన, వసతిని ఉచితంగా ఈ సంస్థలో పొందవచ్చు. ఇక్కడ బీఏ, బీఎస్‌సీ, ఇంటిగ్రేటెడ్‌ బీఎస్‌సీ బీఎడ్‌, ఎంఏ, ఎల్‌ఎల్‌ఎం కోర్సులు అందుబాటులో ఉన్నాయి. వచ్చే విద్యా సంవత్సరంలో ముందస్తు ప్రవేశాలకు ప్రకటన వెలువడింది. పరీక్షలో చూపిన ప్రతిభ, ఇంటర్వ్యూల ద్వారా కోర్సుల్లోకి తీసుకుంటారు!
విద్యార్థులకు నాణ్యమైన విద్య అందించడంతోపాటు వారిలో సామాజిక స్పృహ పెంచడానికి అజీం ప్రేమ్‌జీ విశ్వవిద్యాలయం గట్టిగా కృషి చేస్తోంది. మేటి ఫ్యాకల్టీ, ఆధునిక వసతులు, ఆహ్లాదకరమైన వాతావరణం అన్నింటి మేళవింపుతో బెంగళూరులో ఈ విశ్వవిద్యాలయం ఏర్పాటైంది. సామాజిక అవసరాలు నెరవేరేలా, నాణ్యమైన మానవ వనరులు అందించే లక్ష్యంతో కోర్సులను రూపొందించారు. సైన్సెస్‌, ఆర్ట్స్‌ హ్యుమానిటీస్‌, న్యాయవిద్య, బోధన రంగాల్లో ఆసక్తి ఉన్న విద్యార్థులు ఈ సంస్థలో చదవడానికి ప్రాధాన్యం ఇవ్వవచ్చు. అన్ని కోర్సులవారికీ ఉమ్మడి కరిక్యులమ్‌ తోపాటు, ప్రతి కోర్సులోనూ మేజర్‌ (కంపల్సరీ), ఎలెక్టివ్‌లు ఉంటాయి. వీటికి ఎంపికైనవారికి ఆగస్టు నుంచి తరగతులు మొదలవుతాయి.
ఫీజు సంగతి?
బీఏ, బీఎస్‌సీ, బీఎస్‌సీ-బీఎడ్‌ ఏ కోర్సులో చేరినా తల్లిదండ్రుల వార్షికాదాయం రూ.4 లక్షలలోపు ఉంటే పూర్తి ఫీజు మినహాయింపు లభిస్తుంది. వసతి కూడా ఉచితమే. రూ.4-8 లక్షల లోపు ఉంటే 75 శాతం, 8-10 మధ్య 50 శాతం, 10-15 మధ్య ఉన్నవారికి 25 శాతం ఫీజు, వసతిలో రాయితీ లభిస్తుంది. పీజీ అన్ని కోర్సులకూ రూ. 2 లక్షల లోపు వార్షికాదాయం ఉన్న కుటుంబాలకు చెందినవాకి పూర్తి మినహాయింపు లభిస్తుంది. 2 నుంచి 4 లక్షల లోపు ఉంటే 75 శాతం, 4-6 మధ్య ఉన్నవారికి 50 శాతం, 6-7 మధ్య ఉంటే 25 శాతం ఫీజు తగ్గిస్తారు. రుణ సౌకర్యం ఉంది.
దరఖాస్తుకు చివరి తేదీ: యూజీ కోర్సులకు డిసెంబరు 25, పీజీ కోర్సులకు వర్కింగ్‌ ప్రొఫెషనల్స్‌కు డిసెంబరు 22, రెగ్యులర్‌ విద్యార్థులకు ఫిబ్రవరి 22
పరీక్ష తేదీ: యూజీ, పీజీ రెండు కోర్సులకూ జనవరి 10. రెగ్యులర్‌ విద్యార్థులైతే పీజీ కోర్సులకు మార్చి 21న పరీక్ష ఉంటుంది. వెబ్‌సైట్‌: https://azimpremjiuniversity.edu.in