ఇంటర్నెట్‌ డెస్క్‌: టాలీవుడ్‌ సూపర్‌స్టార్‌ మహేశ్‌బాబు సినిమాల్లోనే కాదు సోషల్‌ మీడియాలోనూ రికార్డులు సృష్టిస్తుంటారు. ఫేస్‌బుక్‌, ట్విటర్‌, ఇన్‌స్టాగ్రామ్‌ ఇలా.. పేరేదైనా మహేశ్‌కు ఉన్న క్రేజే వేరు. ఇదంతా ఇప్పుడెందుకంటే.. ఇన్‌స్టాగ్రామ్‌లో మరోమైలురాయిని అధిగమించారు. తాజాగా.. ఆయనను ఫాలో అవుతున్న వారి సంఖ్య 6 మిలియన్లు దాటింది. గతంలో సామాజిక మాధ్యమాల్లో ఎక్కువగా కనిపించని ఆయన ఈ మధ్యకాలంలో ప్రత్యేకంగా సమయం కేటాయిస్తున్నట్లు తెలుస్తోంది. సోషల్‌ మీడియాలోనే ఎప్పటికప్పుడు అభిమానులకు అప్డేట్స్‌ ఇస్తున్నారు. ఇలా తాజాగా ఆయన 6 మిలియన్ల క్లబ్‌లో చేరారు. ట్విటర్‌లోనూ మహేశ్‌బాబును ఏకంగా 10.9మిలియన్లు అనుసరిస్తున్నారు. అత్యధిక ఆదరణ కలిగిన సౌత్‌ఇండియన్‌ స్టార్‌గానూ ఈ సూపర్‌స్టార్‌ రికార్డు సృష్టించాడు.

ప్రస్తుతం మహేశ్‌బాబు ‘సర్కారువారి పాట’లో నటిస్తున్నారు. ఇటీవల ఈ సినిమా ప్రారంభ పూజా కార్యక్రమం కూడా పూర్తి చేసుకుంది. ఈ కార్యక్రమాన్ని స్వయంగా మహేశ్‌బాబు కూతురు సితార, భార్య నమ్రత చేతుల మీదుగా చేయించారు. సినిమాకు పరుశురామ్‌ దర్శకత్వం వహిస్తున్నారు. కీర్తి సురేశ్‌ కథానాయిక. జీఎం, మైత్రీ మూవీ మేకర్స్‌, 14 రీల్స్‌ ప్లస్‌ సంయుక్తంగా నిర్మిస్తున్నారు. జనవరిలో రెగ్యూలర్‌ షూటింగ్‌ జరగనుంది.