close

ప్రధానాంశాలు

Facebook Share Twitter Share WhatsApp Share Telegram Share
ఫలితం.. త్వరితం

ఆన్‌లైన్‌లో తప్పనిసరిగా బాధితుల సమాచారం
మొబైల్‌ ఓటీపీ ఆధారంగా నమోదు.. పరీక్షలు
నేరుగా ఫోన్‌కే ఫలితాల లింకు
అన్ని ల్యాబులకూ వర్తింపు

కొవిడ్‌ పాజిటివ్‌... నిర్ధారణ పత్రం లేదు... రోగి పరిస్థితి సంక్లిష్టంగా ఉంది. ఇప్పుడున్న నిబంధనల ప్రకారం నిర్ధారణ పత్రం ఉంటేనే బాధితుడిని ఆసుపత్రుల్లో చేర్చుకుంటారు.. దీంతో చాలా మంది తీవ్ర ఇబ్బందులు ఎదుర్కొంటున్నారు.. ఈ సమస్యకు రాష్ట్ర ప్రభుత్వం చెక్‌పెట్టింది. అప్పటికప్పుడే పరీక్షా ఫలితాలు నేరుగా బాధితుల మొబైల్‌ ఫోన్‌కే చేరే విధంగా ‘కొవిడ్‌ ల్యాబ్‌ మేనేజ్‌మెంట్‌ సిస్టం(సీఎల్‌ఎంఎస్‌)’ను ప్రవేశపెట్టింది. రాష్ట్రంలోని అన్ని ప్రభుత్వ, ప్రైవేటు ల్యాబులన్నింటిలోనూ ఈ విధానాన్ని శుక్రవారం నుంచే అమల్లోకి తీసుకొచ్చింది. నమూనాల సేకరణ మొదలుకొని ఫలితాల వెల్లడి వరకు ప్రతి దశలోనూ ఆన్‌లైన్‌లోనూ సమాచారం పొందుపర్చే విధంగా చర్యలు చేపట్టింది.

ఈనాడు,హైదరాబాద్‌: రాష్ట్రంలో తొలి కేసు నమోదవడానికి ముందు నుంచీ ఆర్‌టీ- పీసీఆర్‌ పరీక్షలనే ఎక్కువగా నిర్వహిస్తున్నారు. గత మే, జూన్‌ నెలల్లో నమూనాల సంఖ్య విపరీతంగా పెరగడం.. ల్యాబుల్లో నిర్ధారణకు ఎక్కువ సమయం తీసుకోవడం.. ఫలితాల వెల్లడిలోనూ మూణ్నాలుగు రోజులు పడుతుండడంతో.. గత నెల రోజులుగా రాష్ట్రంలో యాంటీజెన్‌ పరీక్షలను నిర్వహిస్తున్నారు. ప్రస్తుతం రాష్ట్రంలో రోజుకు సుమారు 20-21 వేల పరీక్షలు నిర్వహిస్తుండగా.. ఇందులో యాంటీజెన్‌ పరీక్షలే సుమారు 15-16 వేల వరకూ ఉంటున్నాయి. ప్రభుత్వ వైద్యంలో, ఓపీల్లో యాంటీజెన్‌ పరీక్షల్లో నెగెటివ్‌ వచ్చి, కరోనా లక్షణాలున్న వారికి ఆర్‌టీ-పీసీఆర్‌ పరీక్షలు చేస్తుండగా.. ప్రైవేటు వైద్యంలో ఆసుపత్రిలో చేరినవారికి, ల్యాబులు, ఓపీకి వచ్చినవారికి ఎక్కువగా ఆర్‌టీ-పీసీఆర్‌నే నిర్వహిస్తున్నారు. ఈ క్రమంలో ప్రస్తుతం ప్రభుత్వ వైద్యంలో రోజుకు సుమారు రెండు వేల వరకూ, ప్రైవేటులో మూడు వేల వరకూ ఆర్‌టీ-పీసీఆర్‌ పరీక్షలను చేస్తున్నట్లు వైద్యవర్గాలు చెబుతున్నాయి. అయితే సత్వర ఫలితాలను అందించడంలో యాంటీజెన్‌ పరీక్షలు విజయవంతమైనా.. ఆ ఫలిత పత్రాలను అందించడంలో మాత్రం అదే జాప్యం కొనసాగుతోంది. కొందరికైతే వారం, పది రోజులు గడిచినా ఫలిత సమాచారం అధికారికంగా అందడం లేదు. దీంతో ఇంట్లో ఐసొలేషన్‌లో చికిత్స పొందుతున్న వారికి కొన్ని సందర్భాల్లో ఉన్నట్టుండి సమస్య తీవ్రమైతే.. కొవిడ్‌ పాజిటివ్‌ ఫలిత పత్రం లేకపోవడం పెద్ద సమస్యగా మారుతోంది. ఆ పత్రం ఉంటే తప్ప ఆసుపత్రుల్లో చేర్చుకోకపోవడంతో.. బాధితులు తీవ్ర ఇక్కట్లు పడుతున్నారు.
దీనిపై పెద్దఎత్తున ఫిర్యాదులు అందడంతో.. దిద్దుబాటు చర్యల్లో భాగంగా ప్రభుత్వం ఈ కొత్త విధానాన్ని అమల్లోకి తీసుకొచ్చింది.

ప్రయోజనం ఇలా..
* ఫలిత పత్రం వెంటనే అందుబాటులో ఉండడం వల్ల.. ఒకవేళ పాజిటివ్‌గా నిర్ధారణ అయిన బాధితులకు ఎప్పుడు ఆసుపత్రికి వెళ్లాల్సిన అవసరమొచ్చినా.. వారు నేరుగా వెళ్లిపోవడానికి మార్గం సుగమమవుతోంది.
* ముద్రిత పత్రం అవసరం లేకుండా మొబైల్‌ ఫోన్‌లో ఉన్న లింకు ద్వారా కూడా ఆసుపత్రిలో చేరిపోవచ్చు.
* నెగెటివ్‌ వచ్చినవారు ఇతర అనారోగ్య సమస్యలతో ఆసుపత్రిలో చేరాల్సి వచ్చినా.. ఈ ఫలితం ఆధారంగా ఆటంకాల్లేకుండా సేవలు పొందవచ్చు.
* తప్పుడు ఫోన్‌ నంబరు ఇచ్చి, అధికారులను తప్పుదోవ పట్టించాలనుకునే వారి ఆటలు చెల్లవు.
* ప్రభుత్వ, ప్రైవేటులో ఎక్కడ, ఏ విధానంలో పరీక్షలు చేసినా.. అన్నీ కూడా ఆన్‌లైన్‌లో ఒకేచోట పొందుపరుస్తారు కాబట్టి.. ప్రభుత్వం వద్ద కొవిడ్‌ పరీక్షలు, ఫలితాలకు సంబంధించిన సమాచారం ఉంటుంది.
* మున్ముందు రోజుకు 25-30వేల వరకూ పరీక్షలను ప్రభుత్వ వైద్యంలోనే నిర్వహించాలని యోచిస్తుండడంతో.. సత్వర ఫలితాల వెల్లడికి ఇది దోహదపడుతుందని వైద్యశాఖ భావిస్తోంది.
* కొన్ని ప్రైవేటు ల్యాబుల్లో గుట్టుచప్పుడు కాకుండా పరీక్షలు నిర్వహిస్తూ.. సమాచారాన్ని ప్రభుత్వానికి తెలపడం లేదని అధికారులు గుర్తించారు. ఈ నూతన విధానం ద్వారా అటువంటి అక్రమాలను అడ్డుకోవచ్చు. పరీక్షల్లో పారదర్శకత పెంపొందించడానికి కూడా ఈ విధానం దోహదపడుతుందని వైద్యఆరోగ్యశాఖ ఉన్నతాధికారి ఒకరు చెప్పారు.


నమోదు ఎలా?

* ప్రభుత్వ, ప్రైవేటు..ఏ కొవిడ్‌ నిర్ధారణ పరీక్ష కేంద్రాలకు వెళ్లినా ఇక నుంచి ఒకే విధానాన్ని అనుసరిస్తారు.
* ‘సీఎల్‌ఎంఎస్‌’ విధానంలో సమాచారాన్ని పొందుపరచడానికి వీలుగా ప్రతి ఆసుపత్రిలోని పరీక్ష కేంద్రానికి, ల్యాబుకూ ఒక ‘కోడ్‌’ ఇస్తారు.
* పరీక్ష కేంద్రంలో ముందుగా వ్యక్తి ఇంటి చిరునామా, ఆధార్‌నంబరుతో పాటు తప్పనిసరిగా ఫోన్‌ నంబరు ఇవ్వాల్సి ఉంటుంది.
* ఆ సమాచారాన్ని ‘సీఎల్‌ఎంఎస్‌’ విధానంలో పొందుపరచగానే.. సంబంధిత వ్యక్తి మొబైల్‌ నంబరుకు ‘ఒక్కసారి మాత్రమే నిర్దేశిత కాలపరిమితిలో వర్తించే ఒక పాస్‌వర్డ్‌(ఓటీపీ)’ సంఖ్య వస్తుంది.
* నమూనాలివ్వడానికి వచ్చిన వ్యక్తి ఆ ఓటీపీని నమోదు కేంద్రంలో చెప్పాల్సి ఉంటుంది. సరైన ఓటీపీని ప్రవేశపెడితేనే.. ఆన్‌లైన్‌లో ఆ వ్యక్తి సమాచారం అధికారికంగా నమోదవుతుంది.
* అనంతరం కొవిడ్‌ నిర్ధారణ పరీక్షలకు నమూనాలను స్వీకరిస్తారు.
* నమూనాలిచ్చిన తర్వాత ఫలితం నేరుగా ఆ వ్యక్తి మొబైల్‌ ఫోన్‌కే వస్తుంది.
* యాంటీజెన్‌ ఫలితమైతే 30-45 నిమిషాల్లోపు, ఆర్‌టీ-పీసీఆర్‌ పరీక్ష ఫలితమైతే 24 గంటల్లోపు వెల్లడవుతుంది.
* మొబైల్‌ ఫోన్‌కు వచ్చిన ఫలితం లింకును క్లిక్‌ చేయడం ద్వారా ‘ఫలిత పత్రం’ కనిపిస్తుంది. అవసరమైతే దాన్ని ముద్రించుకోవచ్చు కూడా.

ముఖ్యాంశాలు

జిల్లా వార్తలు

దేవతార్చన


మరిన్ని
రుచులు
+

© 1999- 2020 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact :
040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.