Covid Scanners: స్కానర్లతో కరోనా గుర్తింపు..!

తాజా వార్తలు

Published : 29/06/2021 00:04 IST

Covid Scanners: స్కానర్లతో కరోనా గుర్తింపు..!

అందుబాటులోకి తెచ్చిన అబుదాబి

అబుదాబి: కరోనా వైరస్‌ సోకిన వారిని వీలైనంత తొందరగా గుర్తించే విధానాలను అందుబాటులోకి తెచ్చేందుకు ప్రపంచ దేశాలు ప్రయత్నిస్తున్నాయి. ఇందులో భాగంగా వైరస్‌ ఇన్‌ఫెక్షన్‌ ఉన్న వారిని తేలికగా గుర్తించే సాంకేతికతను అబుదాబి అందుబాటులోకి తెచ్చింది. ముఖ్యంగా రద్దీ ప్రదేశాలైన విమానాశ్రయాలు, మాల్స్‌లో ‘ఫేషియల్‌ స్కానర్ల’తో వైరస్‌ సోకినవారిని గుర్తించేందుకు ఏర్పాట్లు చేసింది. వేల మందిపై జరిపిన పరిశీలనలో దాదాపు 90శాతానికిపైగా కచ్చితత్వంతో ఇన్‌ఫెక్షన్‌ సోకిన వారిని స్కానర్లు గుర్తిస్తున్నాయని అబుదాబి ఆరోగ్యశాఖ వెల్లడించింది.

93శాతం కచ్చితత్వంతో..

కరోనా వైరస్‌ వ్యాప్తిని అరికట్టడంలో ముందుగా వైరస్‌ సోకిన వారిని గుర్తించడమే అత్యంత కీలకం. ఇందుకోసం ఇప్పటికే ఆర్‌టీ-పీసీఆర్‌ (RTPCR) తోపాటు అత్యంత వేగంగా ఫలితాన్నిచ్చే కొవిడ్‌ యాంటీజెన్‌ నిర్ధారణ పరీక్షలు చేపడుతున్నారు. వీటికంటే మరింత వేగంగా వైరస్‌ సోకిన వారిని గుర్తించేందుకు అబుదాబి ఆరోగ్య అధికారులు నూతన సాంకేతికతను వినియోగించారు. ఇందుకోసం వ్యక్తి శరీరంపై కరోనా వైరస్‌ ఆర్‌ఎన్‌ఏ కణాలను గుర్తించే ఎలక్ట్రో మ్యాగ్నెటిక్‌ వేవ్స్‌ (Electromagnetic Waves) సాంకేతికతను ఉపయోగించారు. అబుదాబికి చెందిన ఈడీఈ రీసెర్చ్‌ ఇన్‌స్టిట్యూట్‌ అభివృద్ధి చేసిన ఈ సాంకేతికతను ప్రయోగాల్లో భాగంగా 20వేల మందిపై పరీక్షించారు. అందులో ఇన్‌ఫెక్షన్‌ ఉన్నవారిని 93శాతం కచ్చితత్వంతో స్కానర్లు గుర్తించినట్లు అబుదాబి ఆరోగ్యశాఖ అధికారులు వెల్లడించారు.

వైరస్‌ వ్యాప్తి నియంత్రణలో కీలకం..

రద్దీ ప్రదేశాల్లో ఈ స్కానర్లను వినియోగించడం ద్వారా వైరస్‌ అనుమానితులను ప్రాథమికంగా పసిగట్టవచ్చు. అనంతరం వారికి కొవిడ్‌ పరీక్షలు చేపట్టడం ద్వారా వైరస్‌ సోకిందా? లేదా అనే విషయాన్ని నిర్ధారించుకోవచ్చని అబుదాబి ఆరోగ్య అధికారులు వెల్లడించారు. వైరస్‌ వ్యాప్తిని నియంత్రణలో ఈడీఈ స్కానర్ల సాంకేతికత ఎంతో కీలకమని అభిప్రాయపడ్డారు. అంతేకాకుండా కరోనా సేఫ్‌ జోన్లను వర్గీకరించడంలోనూ ఇవి ఎంతగానో దోహదం చేస్తాయన్నారు. అందుకే వీటిని షాపింగ్‌ మాల్స్‌, విమానాశ్రయాలతో పాటు ఇతర రద్దీ ప్రదేశాల్లో వినియోగిస్తామని వెల్లడించారు.


Advertisement

Tags :

మరిన్ని

జిల్లా వార్తలు
బిజినెస్
మరిన్ని
సినిమా
మరిన్ని
క్రైమ్
మరిన్ని
క్రీడలు
మరిన్ని
పాలిటిక్స్
మరిన్ని
జనరల్
మరిన్ని