Crime news: సేలంలో విషాదం.. భారీ వర్షాలకు కుప్పకూలిన 4 ఇళ్లు!

సేలం: తమిళనాడులోని సేలం జిల్లాలో విషాదం చోటుచేసుకుంది. కరుంగల్‌పట్టిలో నాలుగు ఇళ్లు కుప్పకూలాయి. భారీ వర్షాలకు నానిపోయిన పాత ఇళ్లు ఈ రోజు ఉదయం ఒక్కసారిగా కుప్పకూలగా.. ఆ ఇళ్లలో నివసిస్తున్న వారు శిథిలాల కింద చిక్కుకుపోయారు. సమాచారం అందుకున్న అధికారులు స్థానికుల సహాయంతో యుద్ధప్రాతిపదికన సహాయక చర్యలు చేపట్టారు. శిథిలాల్లో చిక్కుకున్న వారిలో ఇప్పటివరకు 13మందిని వెలికితీసి చికిత్స నిమిత్తం ఆస్పత్రులకు తరలించారు. మరో నలుగురు ఇంకా శిథిలాల కింద ఉన్నట్టు భావిస్తున్నారు. దీంతో అగ్నిమాపక సిబ్బంది సహాయక చర్యల్ని కొనసాగిస్తున్నారు.

మరోవైపు, తమిళనాడులోని తిరునల్వేలి, తూత్తుకుడి, మదురై, రామనాథ్‌పురం జిల్లాల్లో భారీ వర్షాలు కురిసే అవకాశం ఉన్నట్టు భారత వాతావరణ శాఖ అంచనా వేసింది. మిగతా జిల్లాల్లోని పలు ప్రాంతాల్లో మోస్తరు వర్షాలు కురిసే అవకాశం ఉన్నట్టు తెలిపింది. తమిళనాడుతో పాటు పుదుచ్చేరి, కరైకల్‌లోనూ వర్షాలు కురిసే అవకాశం ఉందని హెచ్చరించింది.

► Read latest Crime News and Telugu News