Crime News: ప్రేమించిందని ప్రాణం తీసింది

నిద్రిస్తున్న కుమార్తెను హతమార్చిన తల్లి
వరంగల్‌ జిల్లాలో పరువు హత్య

వరంగల్‌క్రైం, న్యూస్‌టుడే: కుమార్తె కులాంతర వివాహం చేసుకుంటే పరువు పోతుందని భావించిన తల్లి.. బిడ్డను హతమార్చిన ఘటన వరంగల్‌ జిల్లాలో చోటుచేసుకుంది. వరంగల్‌ పోలీసు కమిషనరేట్‌ పరిధిలో జరిగిన ఈ హత్యకు సంబంధించి ఈస్ట్‌జోన్‌ డీసీపీ వెంకటలక్ష్మి తెలిపిన వివరాలు.. పర్వతగిరికి చెందిన ఉబ్బని సమ్మక్కకు ఇద్దరు కుమార్తెలు. పెద్ద కుమార్తెకు వివాహం జరిపించిన అనంతరం భర్త చనిపోవడంతో సమ్మక్క కూరగాయలు విక్రయిస్తూ జీవిస్తోంది. పదో తరగతి చదువుతున్న చిన్న కుమార్తె అంజలి(17).. ఇదే గ్రామానికి చెందిన రాయపురం ప్రశాంత్‌తో ప్రేమలో పడింది. ఈ విషయం తల్లికి తెలియడంతో కుమార్తెను పలుమార్లు మందలించింది. అయినా మార్పు రాకపోవడంతో పెళ్లి చేసుకుంటే తన పరువుపోతుందని భావించిన సమ్మక్క తన తల్లి నాము యాకమ్మతో కలిసి గత నెల 19న అర్ధరాత్రి అంజలి గాఢనిద్రలో ఉండగా ముఖంపై దిండు ఉంచి ఊపిరాడకుండాచేసి హత్య చేశారు. అనుమానాస్పద మృతి కింద కేసు నమోదు చేసిన పోలీసులు సమ్మక్క, యాకమ్మలను విచారించగా కులాంతర వివాహం చేసేందుకు ఇష్టం లేకనే హత్య చేశామని ఒప్పుకున్నారు.