Published : 09/07/2021 23:58 IST

Ap News: ఆసరా కోసం ఆశగా..

సిరిపురం: బుడిబుడి అడుగులు వేయడం మొదలు.. పిల్లలు ఏం చేసినా తల్లిదండ్రులు అందులోనే ఆనందాన్ని వెతుక్కుంటారు. కానీ, పుట్టినప్పటి నుంచే బిడ్డ అచేతనంగా ఉంటే వారికది అంతులేని వేదన. నట్టింట నరకం. నిలబడలేడు.. మాట్లాడలేడు.. కళ్లు పూర్తిగా తెరిచి చూడలేడు. పన్నెండేళ్లుగా మంచానికే పరిమితమైన కుమారుడి కష్టాన్ని తీర్చలేని తల్లిదండ్రుల దీనగాథ ఇది.

తూర్పు గోదావరి జిల్లా ఏలేశ్వరం మండలం సిరిపురంలోని ఎస్సీపేటకు చెందిన దుర్గ, శివ దంపతులకు అభిషేక్ తొలి సంతానం. అయితే పుట్టినప్పటి నుంచి అభిషేక్‌ మిగతా పిల్లల్లా ఎదగలేదు. ఎన్నో ఆసుపత్రుల చుట్టూ తిరిగినా ప్రయోజనం లేకుండా పోయింది. సకల సపర్యలు చేస్తూ కుమారుడి తల్లి తల్లడిల్లుతోంది. అభిషేక్‌కు తరచూ ఫిట్స్ వచ్చినప్పుడు తల్లిదండ్రులు తీవ్ర ఆందోళనకు గురవుతున్నారు. శివ కాంక్రీట్‌ ట్యాంకర్‌ హెల్పర్‌గా పనిచేస్తున్నాడు. ఆయన అంతంతమాత్రం ఆదాయమే వారి జీవనాధారం. కరోనా వీరి కష్టాలను రెట్టింపు చేసింది. 

అభిషేక్‌కు దివ్యాంగ పింఛను కోసం కార్యాలయాల చుట్టూ తిరిగినా ప్రయోజనం శూన్యం. పింఛను మంజూరుకు వేలి ముద్రలు, ఐరిస్‌ నమోదు తప్పనిసరి కాగా అవి నమోదు కావడం లేదు. ఆర్థికంగా బతుకుబండిని లాగలేకపోతున్నామని ఆ తల్లిదండ్రులు వాపోతున్నారు. ఇరుగుపొరుగు వారు బాలుడి కుటుంబానికి వీలైనంత సాయం చేస్తున్నా.. అది చాలడంలేదని కంటతడి పెడుతున్నారు. దంపతులు, ఇద్దరు పిల్లలతో పాటు ఓ వృద్ధురాలు అదే ఇంట్లో నివసిస్తున్నారు. కుటుంబ భారం తగ్గించే దాతల కోసం వేయి కళ్లతో ఎదురుచూస్తున్నారు.

Read latest General News and Telugu News

 Follow us on Facebook, Twitter, Instagram, Koo, ShareChat and Google News. Subscribe our Telegram Channel.

Advertisement

Tags :

మరిన్ని

జిల్లా వార్తలు

సినిమా

మరిన్ని

బిజినెస్

మరిన్ని

క్రీడలు

మరిన్ని

పాలిటిక్స్

మరిన్ని

వెబ్ ప్రత్యేకం

మరిన్ని

జాతీయం

మరిన్ని