CBSE: కొవిడ్‌తో అనాథలైన విద్యార్థులకు పరీక్ష ఫీజు మినహాయింపు: సీబీఎస్‌ఈ

దిల్లీ: సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌ (సీబీఎస్‌ఈ) కీలక నిర్ణయం తీసుకుంది. కరోనా వైరస్‌ కారణంగా తల్లిదండ్రులను కోల్పోయి అనాథలైన 10, 12వ తరగతి విద్యార్థులకు పరీక్ష, రిజిస్ట్రేషన్‌ ఫీజులు మినహాయింపు ఇచ్చింది. విద్యార్థులపై కొవిడ్‌ ప్రభావాన్ని దృష్టిలో ఉంచుకుని 2021-22 విద్యా సంవత్సరం కోసం ఈ ప్రత్యేక నిర్ణయం తీసుకుంది. ఆ విద్యార్థుల నుంచి పరీక్ష ఫీజులు వసూలు చేయకూడదని సీబీఎస్‌ఈ పరీక్షల నియంత్రణాధికారి సన్యం భరద్వాజ్‌ ఆదేశించారు. 10, 12వ తరగతి పరీక్షల కోసం విద్యార్థుల జాబితాను సమర్పించే సమయంలో పాఠశాలలు ఆయా వివరాలను ధ్రువీకరించి నమోదు చేయాలని సూచించారు.