Heavy Rain: తమిళనాడులో విషాదం..ఇల్లుకూలి నలుగురు చిన్నారులతో సహా 9 మంది మృతి

చెన్నై: తమిళనాడులో భారీ వర్షాలు బీభత్సం సృష్టిస్తున్నాయి. ఈ వర్షాల కారణంగా వెల్లూరు జిల్లాలో ఇల్లు కూలి తొమ్మిది మంది దుర్మరణం పాలయ్యారు. మృతుల్లో నలుగురు చిన్నారులు కూడా ఉన్నారని అధికారులు ప్రకటించారు. ఈ ఘటనపై ముఖ్యమంత్రి స్టాలిన్‌ దిగ్భ్రాంతి వ్యక్తం చేశారు. మృతుల కుటుంబాలకు రూ.5లక్షలు చొప్పున పరిహారం ఇవ్వనున్నట్లు ప్రకటించారు. కొద్ది రోజుల క్రితం రాజధాని నగరం చెన్నై కూడా భారీ వర్షాలతో జలమయమైంది. ఇదిలా ఉండగా.. బంగాళాఖాతంలో ఏర్పడిన అల్పపీడనం ఈ రోజు తెల్లవారుజామున తమిళనాడు, ఆంధ్రప్రదేశ్‌ మధ్య తీరం దాటిందని భారత వాతావరణ శాఖ వెల్లడించింది. దాంతో వర్షపాతం క్రమంగా బలహీన పడుతోందని ప్రకటించింది. అయితే, తమిళనాడు, ఆంధ్రప్రదేశ్‌, కర్ణాటకలోని కొన్ని ప్రాంతాల్లో భారీ వర్షాలు పడే అవకాశం ఉందని అంచనా వేసింది.