Cinema news: అనసూయ చిత్రానికి అనూప్‌ స్వరాలు

హైదరాబాద్‌: వ్యాఖ్యాతగా, నటిగా వైవిధ్యమైన కథలు, పాత్రలు ఎంచుకుంటూ కెరీర్‌లో ముందుకు సాగుతోంది అనసూయ. జయశంకర్‌ దర్శకత్వంలో తెరకెక్కుతున్న ఓ విభిన్న కథా చిత్రంలో ఆమె కీలక పాత్ర పోషిస్తున్న సంగతి తెలిసిందే. తాజాగా ఈ సినిమాకు సంగీతం అందించే బాధ్యతను అనూప్‌ రూబెన్స్‌ తీసుకున్నారు. సంక్రాంతి సందర్భంగా ఈ విషయాన్ని చిత్ర బృందం ప్రకటించింది. ఆర్వీ సినిమాస్‌ పతాకంపై ఆర్వీరెడ్డి, శేషు మారంరెడ్డి నిర్మిస్తున్నారు. హెబ్బా పటేల్, సాయికుమార్, అతుల్ కులకర్ణి తదితరులు కీలక పాత్రలు పోషిస్తున్నారు. వినసొంపైన పాటలతో శ్రోతలను అలరిస్తున్న అనూప్‌ రూబెన్స్‌ తమ చిత్రానికి పనిచేయడం అదనపు ఆకర్షణగా నిలుస్తుందని చిత్ర బృందం ఆశాభావం వ్యక్తం చేస్తోంది. అనసూయ ఇందులో ఎయిర్‌హోస్టెస్‌ పాత్రలో కనిపించనుంది. దాదాపు చిత్రీకరణ పూర్తి చేసుకున్న ఈ సినిమా ప్రస్తుతం నిర్మాణానంతర కార్యక్రమాలు జరుపుకొంటోంది. త్వరలోనే టైటిల్‌, ఇతర వివరాలను వెల్లడించనున్నారు.