T20 World Cup: ఆఖర్లో దంచిన కివీస్‌.. పట్టు సడలించిన నమీబియా

ఇంటర్నెట్‌ డెస్క్‌: టీ20 ప్రపంచకప్‌లో భాగంగా వరుసగా రెండు మ్యాచ్‌లు గెలిచి ఊపు మీదున్న న్యూజిలాండ్‌ను భారీ స్కోరు సాధించకుండా నమీబియా బౌలర్లు అడ్డుకున్నారు. అయితే ఆరంభంలో కట్టడి చేసిన నమీబియా.. ఆఖర్లో పట్టు సడలించడంతో కివీస్‌ మంచి స్కోరు చేయగలిగింది. సెమీస్‌ అవకాశాలను మరింత మెరుగుపరుచుకోవాలంటే కివీస్‌ తప్పనిసరిగా గెలవాల్సిన మ్యాచ్‌లో టాప్‌-ఆర్డర్‌ దూకుడుగా ఆడలేకపోయింది. కీలకమైన మ్యాచ్‌లో తొలుత బ్యాటింగ్‌ చేసిన  కివీస్‌ నిర్ణీత 20 ఓవర్లలో నాలుగు వికెట్ల నష్టానికి 163 పరుగులు చేసింది. దీంతో నమీబియాకు 164 పరుగుల లక్ష్యాన్ని నిర్దేశించింది. 

అఫ్గాన్‌ మీద భారీ ఇన్నింగ్స్‌ ఆడిన న్యూజిలాండ్‌ ఓపెనర్ మార్టిన్‌ గప్తిల్ (18: ఒక ఫోర్‌, ఒక సిక్స్‌) ఈసారి పెద్దగా ఆకట్టుకోలేకపోయాడు. నమీబియా బౌలర్లు కట్టుదిట్టంగా బౌలింగ్‌ చేయడంతో ధాటిగా ఆడలేకపోయాడు. కెప్టెన్‌ కేన్‌ విలియమ్సన్‌ (28: రెండు ఫోర్లు, ఒక సిక్స్‌) ఫర్వాలేదనిపించినా.. కీలక సమయంలో ఔటయ్యాడు. డారిల్ మిచెల్‌ (19: రెండు ఫోర్లు) దూకుడుగా ఆడేందుకు ప్రయత్నించాడు. డేవన్‌ కాన్వే (17) విఫలమయ్యాడు. ఆఖర్లో గ్లెన్‌ ఫిలిప్స్‌ (39: ఒక ఫోర్‌, 3 సిక్సర్లు), నీషమ్‌ (35: ఒక ఫోర్‌, రెండు సిక్సర్లు) వేగంగా ఆడటంతో ఈ స్కోరునైనా న్యూజిలాండ్‌ సాధించగలిగింది. పన్నెండు ఓవర్లకు 81/1గా ఉన్న కివీస్‌ స్కోరు 160 దాటిందంటే వీరిద్దరి చలవే. ఆఖర్లో బ్యాటర్లు హిట్టింగ్‌కు దిగడంతో ప్రత్యర్థి ముందు కఠినమైన లక్ష్యాన్ని ఉంచగలిగారు. నమీబియా బౌలర్లలో బెమార్డ్‌, వైజ్‌, ఎరాస్మస్‌ తలో వికెట్‌ పడగొట్టారు.