కాళ్లు సన్నగా మారాలా...

అందం - ఆరోగ్యం

కాళ్లు సన్నగా మారాలా...

కొందరు ఎక్కువ గంటలపాటు కూర్చుని పనిచేయాల్సి ఉంటుంది. అలాంటివాళ్లకు పిరుదులు, తొడల దగ్గర కొవ్వు పేరుకుపోతుంది. దీన్ని త్వరగా తగ్గించడానికి ఈ వ్యాయామాలు ఎంతగానో ఉపయోగపడతాయి.

* నిటారుగా నిలబడి కుడి కాలిని మడిచి పైకి లేపాలి. కుడిచేతిని మడిచి కిందికి తీసుకురావాలి. కాలు పూర్తిగా కింద పెట్టినప్పుడు చేతిని పైకి లేపాలి. రెండు కాళ్లతోనూ ఇలా ఇరవైసార్ల చొప్పున చేయాలి. ఈ వ్యాయామంతో తొడల దగ్గరి కొవ్వు కరిగి కాళ్లు నాజూగ్గా మారతాయి.

* ఫొటోలో చూపిన విధంగా నేల మీద పడుకోవాలి. శరీర బరువును మోచేతులపై వేసి నేల మీద పెట్టాలి. ఇప్పుడు ఒక కాలు కిందకు మరో కాలు పైకి పెట్టాలి. కాళ్లను నేల మీద తాకించకుండా పైకీ కిందకూ తీసుకురావాలి. ఇరవైసార్లు చేసి విశ్రాంతి తీసుకోవాలి. ఇలా రౌండుకు ఇరవై చొప్పున మూడుసార్లు చేయాలి. దీనివల్ల పొత్తికడుపు, తొడల దగ్గరి అదనపు కొవ్వు తగ్గుతుంది.

* మోకాళ్లు, అరచేతులను నేలపై ఆనించాలి. శ్వాస తీసుకుంటూ కుడి మోకాలిని పైకి లేపాలి. వీలైనంత పైకి లేపి పక్కకు జరపాలి. ఇలా ఇరవైసార్లు చేయాలి. తర్వాత ఎడమకాలితోనూ ఇలాగే చేయాలి. దీంతో పిరుదులు, కాలి దగ్గరి అదనపు కొవ్వు త్వరగా కరిగిపోతుంది.

* కింద కూర్చుని రెండు కాళ్లతో చేసే ఈ వ్యాయామాన్ని ‘పక్షిక్రియ’ అంటారు. ఫొటోలో చూపిన విధంగా కూర్చుని చేతులతో పాదాలను పట్టుకోవాలి. మోకాళ్లను పైకీ కిందికీ ఆడించాలి. మోకాళ్లను పైకి తీసుకెళ్లి మోచేతులకు ఆనించాలి. కిందకు తీసుకొచ్చినప్పుడు నేలకు తాకించాలి. మొదట్లో ఇలా 30 వరకు చేయొచ్చు. తర్వాత ఈ సంఖ్యను పెంచుకుంటూ వంద వరకూ చేయాలి. అలా పెంచుకుంటూ రెండు వందల వరకూ చేస్తే తొడల దగ్గర కొవ్వు త్వరగా కరిగిపోతుంది. అంతేకాదు పిరుదులు, కటి కండరాలూ బలోపేతమవుతాయి. దీన్ని ఉదయం, సాయంత్రం కూడా చేయొచ్చు.

Tags :

మరిన్ని

జిల్లా వార్తలు

చదువు సుఖీభవ మకరందం ఈతరం ఆహా హాయ్ బుజ్జీ స్థిరాస్తి రుచులు దేవతార్చన

అందం - ఆరోగ్యం

మరిన్ని

రుచులు

App